Календарь на каждый день

Главная | Народный календарь | Православный календарь | Молитвы | Праздники года | Восточный календарь | Астрологический | Разное

Перейдите на полную версию сайта -> Мобильная версия

Молитвы Преподобному Алипию Печерскому, иконописцу.

Преподобный Алипий, иконописец Печерский

Преподобный Алипий

Молитвы Преподобному Алипию Печерскому, иконописцу

Молитва первая

Преподобне отче Алипие! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.

Молитва вторая

О, священная главо, преподобне отче, преблаженне авво Алипие, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.

Тропарь, глас 8

Зраки изобразуя святых на дщицах, сих благодеяния спешно, яко искусен художник, всехвальне Алипие, нарисовал еси на скрижалех твоего сердца и сего ради, аки образ, благолепне украшен, священства благодатию, аки златом, обложился еси от Христа Бога и Спаса душ наших.

Ин Тропарь, глас 1

Пустынный житель, и во плоти ангел, и чудотворец явился еси, Богоносне отче наш Алипие, постом, бдением, молитвою Небесная дарования приим, исцеляеши недужныя и души верою приходящих ти. Слава Давшему тебе крепость, слава Венчавшему тя, слава Действующему тобою всем исцеления.

Ин Тропарь, глас 8

Слез твоих теченьми пустыни безплодное возделал еси, и иже из глубины воздыханьми во сто трудов уплодоносил еси, и был еси светильник вселенней, сияя чудесы, Алипие, отче наш, моли Христа Бога спастися душам нашим.

Ин Тропарь, глас 4

Боже отец наших, творяй присно с нами по Твоей кротости, не остави милость Твою от нас, но молитвами их в мире Управи живот наш.

Кондак, глас 2

От юности Божественное в себе имея начертание, вдан был еси в научение иконнаго писания; и внегда небеси подобная Богородицы писашася церковь, ты таможде пособствовал и видел еси Духа Святаго осияние, от Негоже приял еси чудес действо, яко иконы твоя чудотворяху, тем тя чтим и ублажаем, чудне Алипие.

Величание

Ублажаем тя, преподобне отче Алипие, и чтим святую память твою, наставниче монахов и собеседниче ангелов.



Похожие православные молитвы, праздники, угодники Божии, чудотворные иконы:

Молитва священномученику Зотику сиропитателю пресвитеру
Молитвы священномученику Антипе епископу Пергамскому
Молитва святителю Стефану епископу Пермскому
Молитва преподобному Никите Столпнику Переславскому чудотворцу
Молитвы к Пресвятой Богородице перед Ея иконой именуемой Тихвинская
Молитва святой великомученице Евфимии Всехвальной
Молитва Преподобному Григорию иконописцу Печорскому
Молитва перед иконой Пресвятой Богородицы именуемой Умягчение злых сердец или Семистрельная
Молитва святым Семи отрокам иже во Ефесе: Максимилиану, Иамвлиху, Мартиниану, Иоанну, Дионисию, Ексакустодиану, Константину, Антонину
Молитвы иконе Пресвятой Богородицы именуемой Толгская
Молитвы Архангелам на каждый день. Архангел Михаил. Архангел Гавриил. Архангел Уриил. Архангел Рафаил. Архангел Селафиил. Архангел Иегудиил. Архангел Варахиил. Архангел Иеремиил.

calendareveryday.ru © Календарь на каждый день, 2011-2017г., Мобильная версия
Правила | Карта сайта | Карта мобильной версии сайта

^Наверх